Home / Canadahye  / Սփյուռքի սեզոնային ու երկարաժամկետ կազմակերպությունների դերը ներհայաստանյան զարգացումներում. «Հայկական վերածնունդ» շարժման Լոս Անջելեսի մասնաճյուղի անդամ Գուրգեն Մխիթարյան

Սփյուռքի սեզոնային ու երկարաժամկետ կազմակերպությունների դերը ներհայաստանյան զարգացումներում. «Հայկական վերածնունդ» շարժման Լոս Անջելեսի մասնաճյուղի անդամ Գուրգեն Մխիթարյան

gurgen mkhitaryan

 

ՎԱՐԴՈՒՀԻ ԱՐԶՈՒՄԱՆՅԱՆ

 

Լոս Անջելես, Տորոնտո (Նորանոր) _ Ինչպես օրեր առաջ տեղեկացրել է Noranor.ca-ն, Սփյուռքում, մասնավորապես ամերիկահայ մի շարք կազմակերպություններ հերթական ստորագրահավաքն են նախաձեռնել, նրանց պահանջագրի նյութը դարձյալ «Սասնա ծռեր»-ն են, բայց այս անգամ կազմակեպություններին վրդովեցրել է, ինչպես պահանջագրում են նշում, Հայաստանում արդար ու անկախ դատական համակարգի բացակայությունը:

 

Հիշեցնենք, որ Երևանում հունիսի սկզբից ընթանում է Սասնա ծռեր զինված խմբավորման անդամների դատավարությունը, որն, ինչպես նրանց պաշտպաններն ու քաղաքացիական ակտիվիստներն են հավաստիացնում, ուղեկցվում է բազմաթիվ խախտումներով ու դատապարտյալների ու փաստաբանների իրավունքների ոտնահարմամբ:

 

«Հայկական վերածնունդ» և մի քանի այլ կազմակերպությունների կողմից ստորագրված պահանջագրին առայժմ միայն ամերիկահայերն են միացել, այնինչ հայտնի է, որ շարժումը մասնաճյուղեր ունի աշխարհի տարբեր երկրներում, այդ թվում և Կանադայում: Թե ինչու նույնատիպ ակտիվություն չեն փորձում ցուցաբերել Տորոնտոյի մասնաճյուղի անդամները, այս մասին Noranor.ca-ն փորձեց պարզաբանում ստանալ Կանադայի մասնաճյուղի անդամ Անաբել Շառոյանից, ով ասաց, որ առայժմ որևէ հստակ պատասխան չի կարող տալ:

 

Շարժման անելիքների ու ստորագրահավաքի վերաբերյալ մեր   հարցերին պատասխանել է «Հայկական վերածնունդ»-ի Լոս Անջելեսի մասնաճյուղի անդամ Գուրգեն Մխիթարյանը:

 

ՆՈՐԱՆՈՐՊարոն Մխիթարյան, ի՞նչն էր հերթական ստորագրահավաք անցկացնելու դրդապատճառը,  արդյո՞ք այն, ինչ տեղի է ունենում «Սասնա ծռեր»-ի դատավարության շրջանակներում, այդչափ մտահոգիչ է, ինչպե՞ս ծնվեց պահանջագիր ներկայացնելու գաղափարը:

 

ԳՈՒՐԳԵՆ ՄԽԻԹԱՐՅԱՆ _ Նախաձեռնությունը եկավ Թամար Հովհաննիսյանից, ինքը ժամանակավորապես ԱՄՆ-ում է, մեր վերջին հանրահավաքին մասնակցեց, քանի որ մի քանի կազմակերպության ներկայացուցիչներ ներկա էին, Թամար Հովհաննիսյանը առաջարկեց նախաձեռնություն, ու դա, քննարկելով տարբեր կազմակերպություններ, խմբագրելով, եկանք դրան:

 

ՆՈՐԱՆՈՐԻսկ ինչպե՞ս եք գնահատում սփյուռքահայերի մասնակցությունը, համացանցում տեսանելի գործընթացից երևում է, որ նույնիսկ անհրաժեշտ 500 ստորագրությունը չի հաջողվում հավաքել, արդյո՞ք հասարակությունն այդքան անտարբեր է:

 

ԳՈՒՐԳԵՆ ՄԽԻԹԱՐՅԱՆ _ Գործողությունը գնում է երեք ուղղությամբ. մեկ ուղղությունն այն է, որ երբ պահանջագիրը բոլոր կազմակերպությունները վավերացրին,  Թամար Հովհաննիսյանը և մի կազմակերպության ներկայացուցիչները տարան հյուպատոսություն: Արդեն հանձնել են հյուպատոսություն և պահանջել հանդիպում հյուպատոսի հետ, որ քննարկվի, երկրորդ ուղղությունը. Մենք ստորագրահավաք ենք անում ոչ միայն օնլայն, այլև մարդկանց հետ շփումներում, փողոցներում, որը ինտերնետում չի երևում, մենք ունենալու ենք հանրահավաք այս կիրակի, և այդ օրն էլ ենք ստորագրությունները հավաքելու, և երրորդ ուղղությունն այն է, ինչ դուք տեսնում եք համացանցում:

 

Խնդիրը միայն քանակի մեջ է, բայց իհարկե շահագրգռվածություն կա, մենք պետք է տարբերենք, թե ովքեր են ակտիվորեն հետաքրքրվում Հայաստանով, տեղի արդարադատության համակարգի, դատաիրավական հարցերի խնդիրներով: Պահանջագիրը ստորագրած կազմակերպությունների նպատակներից մեկը դա է, որ Սփյուռքում այդ գործունեությունը, որը բացակայում է, այդ բացը լրացնել և սկսել սփյուռքահայերին բացատրել, որ Հայաստանը  միայն զբոսաշրջության վայր չէ, այլ պատասխանատվություն կրելու հարց է՝ իր ներքին պրոբլեմներով հանդերձ, և որ սփյուռքահայերն ակտիվորեն հետաքրքրվեն, և երկրորդ՝ ճնշում բանեցնեն այդ իրավիճակն ստեղծողների վրա, որը ներկայիս կառավարությունն ու իշխանությունն է՝ Սերժ Սարգսյանի գլխավորությամբ, և այդ ճնշումի միջոցով օգուտ տանք ժողովրդին, որ ժողովուրդն ավելի հանգիստ ապրի, և այդ ճնշումն այնքան լավ պետք է լինի, որ ռեժիմը հեռացվի, որ ժողովուրդը շունչ քաշի:

 

ՆՈՐԱՆՈՐ –  Պարոն Մխիթարյան, արդյո՞ք ակնկալում եք, որ «Հայկական վերածնունդ»-ին կհաջողվի ազդել հայաստանյան զարգացումների վրա: Չէ՞ որ ընտրությունների ժամանակ Սփյուռքում ստեղծված կազմակերպությունների կողմից վերահսկողություն եղավ, և փորձը ցույց տվեց, որ անգամ դա ոչինչ չփոխեց կամ շատ քիչ ազդեց իրավիճակի վրա:

 

ԳՈՒՐԳԵՆ ՄԽԻԹԱՐՅԱՆ _ Եկեք տարբերենք «Հայկական վերածնունդ»-ը մյուսներից, որոնք ձևավորվել են  ընտրությունների համար, դրանք ժամանակավոր են, ինչպես եկան, այնպես էլ գնացին, չնայած մենք իրենց հետ բանակցություններ էինք վարում սերտորեն և հասկացնում իրենց սխալները, իրենք գործեցին իդեալիստական մտածելակերպից ելնելով, մտածեցին, որ դա լինելիք է հայկական իրականության մեջ:

 

Սփյուռքում մենք ստեղծված ենք չորսուկես տարի առաջ, առաջիններից մեկը Սփյուռքում ստեղծեցինք նոր սկզբունքներով՝ որպես քաղաքացիական շարժում, և մենք ոչ մի ակնկալիք չունեինք ընտրություններին, որովհետև Հայաստանը համարում ենք բռնապետություն, մենք չենք խոսք տվել իշխանափոխություն, մենք հակառակը միշտ պնդել ենք, որ ընտրություններով Հայաստանում իշխանություն չի փոխվելու, դա է «Հայկական վերածնունդ»-ի սկզբունքը, մենք բոլոր կարևոր իրադարձութունների վերաբերյալ դիրքորոշումը հայտնում ենք հայտարարության տեսքով: Ի տարբերություն հարյուրավոր սփյուռքյան կազմակերպությունների, մերը երևի միակն է, որ հանդես է գալիս ընդհանրապես նման հայտարարություններով:

 

ՆՈՐԱՆՈՐԱյսինքն՝ կարծում եք, որ ընտրությունները վերահսկելու նպատակով ստեղծված կազմակերպություններն ու ակտիվ անհատներն իզուր ժամանակ ու ֆինանսական միջոցնե՞ր վատնեցին:

 

ԳՈՒՐԳԵՆ ՄԽԻԹԱՐՅԱՆ _ Այո, նրանք սեզոնային էին, սեզոնը ընտրությունների սեզոնն էր, ընտրություններն անցան, իրենք վերջացան, նրանք ասում էին, որ գնում ենք ընտրությունները վերահսկելու, ինչպես հայտարարել էին, այնպես էլ արել են, հեռուն գնացող ծրագրեր չեն ներկայացրել:

 

Արսինե Խանջյանին, Ատոմ Էգոյանին, բոլորին բացատրել ենք մեկ առ մեկ, որ իրենք իդեալական պլատֆորմից են հանդես գալիս, ոչ մի կապ չունի իրականության հետ իրականում, իրանք փորձեցին ասել՝ ոչ, օրինակներ էին բերում, շեշտում Չիլիի օրինակը, որ հնարավոր է ընտրություններով իշխանափոխություն, և ինչպես հիմա տեսնում եք, իրենք լռության են մատնվել, որովհետև ասելիք չունեին, իսկ մենք ունեինք, և ճիշտ էինք մինչև ընտրությունները, ճիշտ ենք հիմա:

 

ՆՈՐԱՆՈՐԻսկ ինչո՞ւ համախմբվածություն չկա «Հայկական վերածնունդ»-ի տարբեր երկրներում գործող մասնաճյուղերի միջև, ինչո՞ւ իրենք էլ չեն միանում ձեր նախաձեռնած ստորագրահավաքին, օրինակ Տորոնտոյում դեռ չեն կողմնորոշվել: Ի՞նչն է պատճառը:

 

ԳՈՒՐԳԵՆ ՄԽԻԹԱՐՅԱՆ _ Մենք ունենք մասնաճյուղեր, հենց Կանադայում էլ, Տորոնտոյի մասնաճյուղը, որը ակտիվ  մասնաճյուղ է, այնպես որ Տորոնտոյում ունենք աջակիցներ, մենք ստորագրել ենք որպես Լոս Անջելեսի մասնաճյուղ, այս պահանջագիրը, որովհետև մենք ենք բանակցությունները վարել, բայց քանի որ աջակցություն ստացանք ամբողջ կազմակերպության կողմից,  ամբողջ կազմակերպությունն է ստորագրում պահանջագիրը:

 

Իսկ եթե ասում եք՝ ուրիշները միանան, դուք պետք է պատկերացնեք Սփյուռքի վիճակը, շատ փոքրամասնությունն է հետաքրքրվում՝ ուզում է պահանջագիր լինի, ուզում է ընտրություններ լինի, ուզում է ռեֆերենդում լինի անօրինական Սահմանադրության, աննշան մարդիկ են դիրքորոշում ներկայացնում, միգուցե խոհանոցներում տանը խոսում են, բայց կազմակերպված ոչինչ չկա:

 

ՆՈՐԱՆՈՐՈրքանո՞վ է այդ իրավիճակին նպաստում ՀՅԴ-ն, որն ինչպես գիտենք, Սփյուռքում մեծ թվով անդամներ ունի, նույնիսկ ոմանք այն կարծիքին են, որ Սփյուռքի մեծամասնությունը դաշնակցական է, իսկ Հայաստանում այս քաղաքական ուժը կանգնած է իշխանությունների կողքին՝ որպես կոալիցիոն անդամ: Դա ինչպե՞ս է ազդում կամ խանգարում ձեր ծրագրերին:

 

Գուրգեն Մխիթարյան _ Դա չի խանգարում մեր թվի ավելացմանը, որովհետև ինչպես նրանք, այնպես էլ  մենք փորքամասնություն են կազմում ընդհանուր Սփյուռքի մեջ, իրենք էլ չեմ կարծում, որ մի քանի տոկոսից ավելի մարդ ունեն Լոս Անջելեսում, իրենք պարզապես պատմություն ունեն, իսկ մենք ընդամենը չորսուկես տարվա կազմակերպություն ենք, բայց եթե ասեմ, որ շարքերից դուրս աջակցություն շատ ունեն Լոս Անջելեսում, սուտ է, խնդիրը հոծ զանգվածն է, մոտ 90-95 տոկոսը համայնքի, որը ոչ մի բանով չի հետաքրքրվցում, ոչ իրենց հետ են, ոչ մեր հետ, մեր աշխատանքը այս մարդկանց հետ է:

 

ՆՈՐԱՆՈՐ – Դաշնակցական անդամներ չունե՞ք:

 

ԳՈՒՐԳԵՆ ՄԽԻԹԱՐՅԱՆ _ Մենք դաշնակցական նախկին անդամներ ունենք, բայց կարող ենք ունենալ նաև դաշնակցական անդամներ, որովհետև մեր կառուցվածքը թույլ է տալիս, իրենք իրենց անունը քաղաքական կուսակցություն են դրել, բայց մենք քաղաքական կուսակցություն չենք, մենք քաղաքացիական շարժում ենք, որի անդամ կարող են լինել և հնչակը, և դաշնակը, ով ուզում է:

 

ՆՈՐԱՆՈՐԽնդրում եմ ներկայացրեք ձեր առաջիկայի կարևոր անելիքները, որոնք, կարծում եք, որ ազդեցիկ հետևանքներ կիարող են ունենալ կամ որևէ դրական փոփոխության բերել:

 

ԳՈՒՐԳԵՆ ՄԽԻԹԱՐՅԱՆ_ Քանի որ Սասնա ծռերի գործողությունների առաջին տարելիցն է, Հայկական վերածնունդը աշխահի  երեք քաղաքներում կազմակերպելու է 3 հանրահավաք, Լոս Անջելեսում, Նյու Յորքում և Ստրասբուրգում, մի քանի կազմակերպություններ էլ են միացած, Ստրասբուրգում միայն մերոնք ենք, տարբեր երկրներից գնալու են Ստրասբուրգ և հանդիպում են  ունենալու պաշտոնական անձանց հետ, մենք ակնկալում ենք գոնե տեղի համայնքի իրազեկումը, քնից արթնացնելը, իսկ  իրենք պաշտոնական հանդիպումներ կունենան, որոնց արդյունքը կարող է այլ լինել:

 

 

 

Ձեր կարծիքը

Comments