Home / Canadahye  / Երեք զավակների մայրը, ով օժանդակում է, որպեսզի Տորոնտոյի հայկական դպրոցը շարունակի հայեցի դաստիարակություն տալ հայ մանուկներին

Երեք զավակների մայրը, ով օժանդակում է, որպեսզի Տորոնտոյի հայկական դպրոցը շարունակի հայեցի դաստիարակություն տալ հայ մանուկներին

 

ՎԱՐԴՈՒՀԻ ԱՐԶՈՒՄԱՆՅԱՆ

Տորոնտո (Նորանոր) _ Նատաշա Բաքոսը Տորոնտոյում է ծնվել, նրա երեք դուստրերը՝ ևս: Դպրոցահասակ աղջիկները հաճախում են Հայ կենտրոնի վարժարան, իսկ երիտասարդ մայրը ոչ միայն վճարում է ուսման համար, այլև ջանք չի խնայում, որպեսզի հայկական դպրոցը այլ եկամուտներ ևս կարողանա ապահովել ու շարունակել կրթել հայ մանուկներին:

 

Կարողանան փոքրիկներս երթան այդ դպրոցը և հայեցի մեծնան, հայությունը մնա

 

«Ես կսիրեմ, անոր համար ուզեցի դպրոցին ալ օգնել, որ կարողանան փոքրիկներս երթան այդ դպրոցը և հայեցի մեծնան, հայությունը մնա:  Մեր խումբին մեջ կան 20 տարբեր մայրիկներ, որ կօգնեն, մեր ժամանակը կու տանք, այսօր նույնիսկ առտվա ժամուն դպրոց գացինք, որ ճաշ եփենք»,-պատմում է Նատաշա Բաքոսը:

 

ՄԻՋԻՆՔԻ ՆԱԽԱՁԵՌՆՈՒԹՅՈՒՆԸ

Նա դպրոցի ծնողական խորհրդի անդամներից մեկն է, բացի այս և 3-7 տարեկան զավակներին մեծացնելուց հասցնում է նաև մարզել կանանց, մարզասրահ է հիմնել: Նաև չի զլանում՝ որպես դպրոցի ծնողական խորհրդի անդամ, ակտիվորեն միջոցառումներ կազմակերպել, ջանք ներդնել՝ դպրոցին օգնելու համար: Դրանցից մեկն էլ առաջիկայում նախատեսված «Միջինքի» արարողությունն է: Նախաձեռնությունը՝ դպրոցից, կազմակերպչական ջանքերը՝ երիտասարդ մայրիկներից:

 

Ինչ-որ դրամ կելնե, դեպի դպրոց կերթա իրենց օգնության համար

 

«Միջինքին, ով որ հարս կըլլա այդ տարվան ընթացքին, կու գան, իրենց նվեր կու տանք, իրենց և իրենց ընտանիքներուն անդամներին կպատվենք, ամենքն ալ տիկիններ կմասնակցեն, պահքի ճաշերով, երաժշտությունով, պարով կանցկացնենք Միջինքը: Դպրոցն է ընողը, ինչ որ դրամ կելնե, դեպի դպրոց կերթա իրենց օգնության համար»,-պատմում է միջոցառման կազմակերպիչներից մեկը:

 

Հանգանակություն հաջողվում է կատարել, միայն թե արարողության ավանդական ծիսակարգերը չեն պահպանվում, այդ առաքելությունը ՀՕՄ-ն է իրականացնում, իրենք ստանձնել են տոնական տրամադրության ապահովումը:

 

ԱՌՈՂՋ ԱՊՐԵԼԱԿԵՐՊ

Նատաշա Բաքոսը լուրջ ծրագրեր ունի նաև սեփական մարզասրահի մեծացման շուրջ: Առողջ ապրելակերպը ոչ միայն իր նախընտրությունն է, այլև ձգտում է ուրիշներին էլ վարակել նման կենսակերպով:

 

«Նոր է տակավին իմ ըրածս, դասերը տարել եմ և կամաց-կամաց պիտի մեծցնեմ մարզանքիս ճյուղը: Մարզանք կընեն, որ տիկինները նիհարեն, զորանան, ուժ ունենան: Մեծամասնությունը հայ է, որովհետև դպրոցին ու ակումբին մայրիկները կու գան, բայց օտարներն էլ ոչ չեմ ըսեր»,-ասում է մարզասրահի հիմնադիրը:

 

Տորոնտոյում կենսապայմանները լավ են, բայց կան երազանքներ, որոնք դեռ պետք է իրականանան: Կանադահայ երիտասարդը դեռ չի եղել հայրենիքում, դրա հնարավորությունը չի ունեցել, քանի դեռ զավակները փոքր էին, հիմա արդեն ասում է՝ պատրաստ է Հայաստան այցելելու: Նշում է.

 

«Ես դժբախտաբար տակավին չեմ այցելկած, կփափագիմ, բայց մամաս հոն էր քանի մը ամիս առաջ, ես երեք հատ պստիկ ունիմ, հիմա որ մեծ են, կփափագեի այցելել Հայաստան»:

 

Հայաստանը չի տեսել, բայց իր համար օտար չէ հայրենիքը, գուցե և ավելի հոգեհարազատ դառնա ու այցելելուց հետո որոշեն հաստատվել այնտեղ, իսկ մինչ այդ հետևում են նրանց, ովքեր հիմնական կամ ժամանակավոր կեցություն են ապահովում հայաստանում: Ասում է.

 

Կա  հույս, որովհետև ամեն ինչերը հոս ձգեցին, գացին և ուրախ կյանք սկսեցին

 

«Գանք, տեսնենք, կրնա ըլլալ, որ սիրահարվինք մեր Հայաստանին, չեմ գիտեր ճակատագիրը ինչ որոշած է, բայց եթե լավ ըլլա, ինչո՞ւ չէ: Գիտեմ քանի մը ընտանիքներ, որ հոստեղեն ելած են ու հոն փոխադրված են, գիտեմ, որ կես տարին հոն կապրին, կես տարին հոս կապրին: Կա  հույս, որովհետև ամեն ինչերը հոս ձգեցին, գացին և ուրախ կյանք սկսեցին»: